Umhverfis jörðina á eigin spiki

Nýsjálenskur maður hefur látið smíða fyrir sig mjög svo sérstakan bát sem gengur fyrir lífrænu eldsneyti.

Á honum ætlar hann að slá hraðamet í siglingu umhverfis jörðina. Til þess að afla eldsneytis lét Pete Bethune fitusjúga sjálfan sig og fer því hluta leiðarinnar á eigin spiki. Bethune segir að mengandi útblástur frá vélum bátsins sé nákvæmlega enginn.

Báturinn, sem lítur út eins og eitthvað úr Starwars, ber nafnið Earthrace. Til þess að smíða hann veðsettu Bethune hjónin húsið sitt og seldu allar aðrar eigur sínar.

Það er breski báturinn Cable and Wireless Adventurer sem nú á hraðametið umhverfis jörðina. Hann fór leiðina á 75 dögum. Bethune ætlar að fara hana á 65 dögum. Til þess þarf hann að halda milli 20 og 25 hnúta meðalhraða.