Bruce Arena óánægður með ákvörðun Beckham

Bruce Arena, þjálfari bandaríska MLS-liðsins LA Galaxy, virðist allt annað en ánægður með þá ákvörðun David Beckham að fara til AC Milan yfir vetrarmánuðina.

Lánssamningur mun vera tilbúinn til undirritunar en Arena, sem er fyrrum landsliðsþjálfari Bandaríkjanna, virðist ósáttur.

„Ég sé ekki hvernig þetta eigi að gagnast LA Galaxy eða MLS-deildinni," sagði hann. „Ég veit ekki hvort að þetta muni ganga í gegn en ég er að reyna að byggja upp almennilegt lið fyrir næsta tímabil. Það verður erfitt að gera það ef við losum okkur við alla okkar bestu leikmenn. Það er erfitt fyrir mig að starfa við þessar aðstæður."