Uppboð í Fold

Galleri Fold heldur uppboð á mánudagskvöldið kemur í húsnæði sínu við Rauðarárstíg og hefst það kl. 18. Fjöldi verka verða boðin upp að venju og þar á meðal fjölmörg verka gömlu meistaranna en einnig eftir nokkra af samtímalistamönnum okkar. Síðasta listmunauppboð sem haldið var í fyrsta skipti í húsakynnum Gallerís Foldar við Rauðarárstíg gekk vonum framar. Húsfyllir var og þurftu þó nokkrir að standa. Því benda uppboðshaldarar gestum á að mæta tímanlega til að tryggja sér sæti. Hægt er að bjóða í gegnum síma og gera forboð í verkin ef áhugasamir eiga ekki heimangengt. Verkin verða til sýnis um helgina í Galleríi Fold og einnig má skoða þau frá laugardagsmorgni á vef uppboðshússins: www.myndlist.is.

Tveim sýningum í Galleríi Fold lýkur nú um helgina. Annars vegar sýnir Haukur Dór málverk í Forsal gallerísins og hins vegar sýnir Hulda Vilhjálmsdóttir málverk í Hliðarsalnum. Báðir listamennirnir taka á móti gestum á sunnudaginn á milli 14 og 16 og spjalla um verkin og sýningu sína. Þetta er tilvalið tækifæri til að komast í kynni við listamennina og fá innsýn í hugarheim þeirra.

- pbb