Voru risaeðlurnar bara heppnar?

Ýmislegt þykir benda til þess að yfirburðastaða risaeðla á jörðinni fyrir rúmum 200 milljónum ára hafi verið hrein tilviljun.

Steingervingafræðingar við Columbia-háskólann í New York hafa leitt líkum að því að löngu útdauð dýrategund, forfeður krókódíla, hafi verið nánast jafnatkvæðamikil og risaeðlurnar á sínum tíma. Rannsóknir á steingerðum leyfum 64 tegunda af risaeðlum og keppinauta þeirra hafa leitt í ljós að frumkrókódílar þessir voru ekki bara að mörgu leyti líkamlega hæfari en eðlurnar heldur hafa þeir ef að líkum lætur einnig verið fleiri á tímabili.

Steingervingafræðingurinn Thomas Holtz spyr því hvernig á því standi eiginlega að risaeðlurnar hafi orðið ráðandi tegund þær 30 milljónir ára sem báðar tegundirnar deildu jörðinni. Þessar skepnur þróuðust á svipuðum hraða og báðar tegundirnar höfðu burði til að verða sterkari. Um það má deila hvort kenning Holtz teljist hávísindaleg en hann telur risaeðlurnar hreinlega hafa verið heppnar.