Ást fær frábæra dóma

Söngleikurinn Ást, eða Love - The musical, sem Vesturport setur upp í Lyric Hammersmith-leikhúsinu í London hefur hlotið frábæra dóma í hinum ýmsu fjölmiðlum ytra. Gagnrýnandi Daily Mail gekk svo langt að segja að sýningin væri sú besta sem sett hefði verið á svið frá því að nýr listrænn stjórnandi tók til starfa hjá Lyric Hammersmith-leikhúsinu.

Evening Standard Critics Choice setur sýninguna meðal fimm bestu leikrita í leikhúsum Lundúna í dag og er hún þar fyrst á blaði. Gagnrýnandi Observer fer einnig fögrum orðum um sýninguna, sem og gagnrýnandi Financial Times sem segir hana góða áminningu til stjórnvalda sem sópa málefnum gamla fólksins gjarnan undir teppið. Sýningin minni okkur á að gamla fólkið deili með okkur menningu og tilfinningum.

Sýningin hefur fengið víða góðar viðtökur en einnig slæmar líkt og hún fékk til að mynda í tímaritinu Whats On Stage. Af góðu viðbrögðunum að dæma má gera ráð fyrir því að útrás íslenskrar menningar sé nokkuð sem getur gengið upp.

Sýningin er eftir þá Víking Kristjánsson og Gísla Örn Garðarsson en sá síðarnefndi leikstýrði verkinu. Love - The Musical verður sýnd í Lyrics Hammersmith-leikhúsinu til 21. júní.

-shs