Eiður og Margrét Lára knattspyrnumenn ársins

Eiður Smári Guðjohnsen og Margrét Lára Viðarsdóttir hafa verið útnefnd knattspyrnumenn ársins í karla- og kvennalfokki af Knattspyrnusambandi Íslands.

Það var leikmannaval KSÍ sem stóð að þessu vali í fimmta sinn, en að valinu koma fyrrum landsliðsmenn, þjálfarar og forystumenn í hreyfingunni.

Veitt eru verðlaun fyrir þrjú efstu sætin í hvorum flokki, en bæði Eiður Smári og Margrét Lára eru nú að taka við þessum verðlaunum í fjórða skipti.

Karlaflokkur:

Eiður Smári Guðjohnsen varð í öðru sæti spænsku deildarinnar með liði sínu Barcelona og komst í undanúrslit Meistaradeildar Evrópu. Hann lék auk þess sex landsleiki og skoraði í þeim þrjú mörk og er markahæsti leikmaður íslenska landsliðsins frá upphafi.

Í öðru sæti varð Veigar Páll Gunnarsson sem átti frábært ár með norska liðinu Stabæk og var lykilmaður í liðinu þegar það tryggði sér sinn fyrsta meistaratitil í haust. Hann tók þátt í sex landsleikjum og skoraði eitt mark.

Í þriðja sæti varð svo Grétar Rafn Steinsson sem gekk í raðir Bolton í byrjun árs og hefur átt fast sæti í byrjunarliðinu allar götur síðan. Hann lék fimm landsleiki á árinu og náði að skora mark.

Kvennaflokkur:

Margrét Lára Viðarsdóttir fór á kostum með liði sínu Val í sumar þegar liðið varð íslandsmeistari og varð markadrottning Landsbankadeildarinnar fimmta árið í röð. Hún varð einnig markadrottning undankeppni EM þar sem hún skoraði 14 mörk þegar íslenska liðið tryggði sér þátttöku á lokamótinu. Margrét Lára hefur skorað 43 mörk í 46 landsleikjum.

Í öðru sæti varð Hólmfríður Magnúsdóttir hjá KR sem varð í öðru sæti á Íslandsmótinu og fór svo á kostum þegar KR varð bikarmeistari þar sem hún skoraði þrennu í úrslitaleiknum. Hólmfríður var líka í stuði með landsliðinu og skoraði fjögur mörk í átta leikjum.

Í þriðja sæti var Dóra María Lárusdóttir hjá Val sem skoraði 15 mörk í 17 leikjum með Íslandsmeisturunum í sumar. Hún lék alla tólf leiki landsliðsins og skoraði tvö gríðarlega mikilvæg mörk í síðari úrslitaleiknum við Íra í umspilinu.