Aukin fjárframlög frá KSÍ til barna- og unlingastarfs

Stjórn KSÍ ákvað á fundi sínum að auka fjárframlög til barna- og unglingastarfs aðildarfélaga sambandsins auk þess sem frestur vegna framkvæmda samkvæmt leyfiskerfi KSÍ er framlengdur.

KSÍ er með þessu að bregðast við breyttum aðstæðum í íslensku efnahagslífi eins og segir í fréttatilkynningu frá sambandinu. Kröfur leyfiskerfisins eru óbreyttar en félögum nú gefinn lengri frestur til að mæta þeim.

Allt að 140 milljónir króna verða greiddar til félaganna á þessu og næsta ári. Knattspyrnusamband Evrópu leggur 30 milljónir til á þessu ári og KSÍ bætir við 40 milljónum.

Tilkynninguna má lesa hér:

„Á fundi stjórnar KSÍ 28. október 2008 var ákveðið að bregðast við gjörbreyttum aðstæðum í íslensku efnahagsumhverfi með því að stórauka fjárframlög til barna- og unglingastarfs aðildarfélaga sambandsins auk þess sem veittur verður lengri tími til að uppfylla veigamestu þætti í uppbyggingu mannvirkja fyrir áhorfendur skv. leyfiskerfi KSÍ. Það er von KSÍ að þessar ákvarðanir komi sér vel í rekstri aðildarfélaganna.

Samþykkt var að veita allt að 140 m. kr. til barna- og unglingastarfs íslenskra knattspyrnufélaga á þessu og næsta ári. Á næstu vikum koma til greiðslu 70 m. kr. fyrir árið 2008 og sama upphæð verður greidd út í lok næsta árs fyrir starfsárið 2009. Knattspyrnusamband Evópu (UEFA) leggur KSÍ til um 30 milljónir króna vegna barna - og unglingastarfs á árinu 2008 og ákvað stjórn KSÍ að leggja til um 40 milljónir til viðbótar þannig að heildarframlag árið 2008 verður því um 70 milljónir króna. Með stórauknu framlagi til barna - og unglingastarfs vill KSÍ standa vörð um hið mikilvæga uppeldisstarf aðildarfélaganna. Úthlutun til einstakra félaga og forsendur framlaga til barna - og unglingastarfs má sjá á meðfylgjandi skjali.

Jafnframt samþykkti stjórn sambandsins að leita samþykktar UEFA við því að lengja aðlögunartíma aðildarfélaga er undirgangast leyfiskerfi KSÍ að mannvirkjaákvæðum kerfisins til ársins 2012 í stað ársins 2010. Í mannvirkjakafla leyfiskerfis KSÍ er kveðið á um lágmarks sætafjölda fyrir áhorfendur og yfirbyggingu á áhorfendastúku. Þar er veittur möguleiki á undanþágu frá þeim reglum allt til ársins 2010 að uppfylltum ákveðnum skilyrðum. Samþykkt stjórnar KSÍ hefur þá þýðingu að möguleiki á undanþágu er framlengdur til upphafs keppnistímabilsins 2012 en með þessu vonast stjórn KSÍ til þess að komið sé til móts við sjónarmið aðildarfélaga KSÍ og sveitarfélaga um að draga úr fjárútlátum til mannvirkjagerðar á meðan óvissuástand ríkir. Jafnframt vonast stjórn KSÍ að ákvörðun þessi skapi betri möguleika fyrir sveitarfélög til þess að standa enn betur að baki rekstri knattspyrnufélaga í landinu.

Knattspyrnusamband Íslands tekur undir áskorun menntamálaráðherra, Þorgerðar Katrínar Gunnarsdóttur, sem hún sendi frá sér í síðustu viku um eflingu íþróttastarfs vegna þeirra aðstæðna sem nú eru uppi í íslensku þjóðfélagi. Aðildarfélög eru hvött til að eiga fund með stjórnendum sinna sveitarfélaga og setja upp aðgerðaráætlun sem hrint verði í framkvæmd strax á næstu dögum eða vikum með það að markmiði að auka enn frekar möguleika barna - og unglinga á skipulögðu starfi knattspyrnuhreyfingarinnar. Markmiðið hlýtur að vera að allir fái tækifæri til að vera með óháð efnahag eða félagslegri stöðu og því er mikilvægt að allir taki höndum saman og tryggi aðgang barna - og unglinga að starfsemi knattspyrnufélaganna."