Ljóstrað upp um Banksy?

Breska dagblaðið The Mail on Sunday fullyrðir að hinn dularfulli graffítilistamaður Banksy heiti í raun Robin Cunningham og sé 34 ára gamall.

Blaðið heldur því fram að borin hafi verið kennsl á listamanninn af mynd sem tekin var af honum fyrir fjórum árum á Jamaíka. Talsmaður Banksys vill ekki tjá sig um fréttina. „Ég segi það sem ég segi alltaf: Ég staðfesti aldrei né neita svona fregnum.“

Verk Banksys hafa birst víða um heim á opinberum stöðum. Þau hafa notið mikilla vinsælda og hafa þekkt nöfn á borð við Christinu Aguilera og Angelinu Jolie keypt þau.

Mikil leynd hefur alla tíð hvílt yfir því hver Banksy er. Það eina sem vitað er um listamanninn er að hann ólst upp í Bristol.