Kýs frekar að tapa 0-3 en vinna eins og Inter

Inter hefur átta stiga forskot í ítölsku deildinni en Roma er í öðru sæti. Mikið hefur verið talað um furðulega dóma Inter í hag í leikjum Ítalíumeistarana. Nú hefur Bruno Conti, fyrrum þjálfari Roma, ákveðið að kasta olíu á eldinn.

„Ég kýs frekar að tapa leikjum 0-3 en vinna svona sigra eins og Inter hefur verið að gera," sagði Conti sem nú situr í stjórn Roma. Liðið tapaði einmitt óvænt 0-3 fyrir Siena fyrr í þessum mánuði.

„Við áttum slæman dag og töpuðum verðskuldað fyrir liði sem er að berjast fyrir lífi sínu í deildinni. Ég kýs frekar að tapa þannig leikjum en vinna leiki sem ég á ekki skilið að vinna."

Þessi orð Conti hafa fallið í grýttan jarðveg hjá Inter. Þess má geta að Inter leikur gegn Livorno í dag og Roma heimsækir Juventus í kvöld.