Fóður og fjör Við pollinn

Veitingastaðurinn Við Pollinn á Ísafirði tekur þátt í hátíðinni „Fóður og fjör“ sem haldin verður víðs vegar um land um helgina. Halldór Karl Valsson, annar eigenda veitingastaðarins, segir veitingastaðinn ætla að vera með vestfirska framleiðslu á boðstólum. „Við verðum bara með hráefni sem kemur af svæðinu. Kokkarnir á veitingastaðnum sjá alfarið um matreiðsluna og boðið er upp á lifandi tónlist fyrir matargesti,“ segir Halldór Karl. Er þetta annað árið í röð sem hátíðin er haldin á Ísafirði en á undanförnum árum hefur matarhátíðin Food & fun í Reykjavík áunnið sér veglegan sess í borgarlífinu og nú vilja veitingastaðir úti á landi bjóða upp á spennandi matseðil í stórbrotinni íslenskri náttúru á þessum tíma árs.

Veitingastaðurinn hefur einnig opnað nýja heimasíðu þar sem allar helstu upplýsingar um staðinn eru að finna ásamt matseðlum, veisluþjónustu og þjónustu vegna funda eða ráðstefna. Halldór Karl segir síðuna hugsaða til að koma til móts við viðskiptavininn og auðvelda honum aðgengi að grunnupplýsingum um veitingastaðinn.

birgir@bb.is