Mál Beckham þurfa að leystast á morgun

Don Garber, forráðamaður bandarísku MLS-deildarinnar, segir að niðurstaða þurfi að koma í mál David Beckham í síðasta lagi á morgun.

Beckham er nú í láni hjá AC Milan frá LA Galaxy og rennur lánssamningurinn út þann 8. mars næstkomandi. Hins vegar hefur Beckham gert ljóst fyrir því að hann vill vera áfram í herbúðum AC Milan.

„Ef David telur að hann vilji vera áfram hjá AC Milan og félagið vill kaupa hann erum við reiðubúnir að verða við þeirri ósk," sagði Garber. „En þetta mál hefur verið að fara í hringi og það þarf að koma niðurstaða í þetta mál á föstudag í síðasta lagi."

„Það er engin ástæða fyrir því að draga þetta á langinn. Annað hvort vilja þeir gera þetta eða ekki. Þeir verða að skilja að það er ekki langt í að tímabilið byrji hér úti."