KR-ingar hafa unnið báða bikarleiki sína á Hlíðarenda - hvað gerist í kvöld?

Valur og KR mætast í dag á Vodafone-vellinum í síðasta leik átta liða úrslita VISA-bikars karla og sigurvegarinn verður í pottinum ásamt Keflavík, Fram og Breiðablik þegar dregið verður í undanúrslitin.

Þetta er ellefti bikarleikur Vals og KR frá upphafi og hefur KR-liðið unnið fimm þessara leikja.

Valsmenn hafa unnið tvo leiki og svo tvo leiki til viðbótar eftir vítakeppni. Einn leikur hefur endað með jafntefli en það var fyrri bikarúrslitaleikur liðanna 1990.

Valsmenn eru á heimavelli í þessum leik en það hefur þó ekki reynst þeim vel að taka á móti KR-ingum í bikarnum á Hlíðarenda því KR-ingar hafa unnið báða bikarleiki sína undir Öskjuhlíðinni og Valsmenn náðu meira segja ekki að skora í hvorugum leiknum. Líkt og í hin skiptin mætir annað liðið í leikinn sem ríkjandi bikarmeistari en KR-ingar unnu einmitt bikarinn í fyrra.

KR vann 1-0 sigur á Val á Hlíðarenda í átta liða úrslitum 1989. Heimir GUðjónsson skoraði sigurmarkið beint úr aukaspyrnu á 71. mínútu en Valsmenn voru þá ríkjandi meistarar. Atli Eðvaldsson, núverandi þjálfari Vals, var leikmaður Vals á þessum tíma en gat ekki tekið þátt í leiknum vegna meiðsla. Atli hefur aldrei tapað með Val á móti KR.

KR vann 2-0 sigur á Val á Hlíðarenda í átta liða úrslitum 1996. Ríkarður Daðason og Guðmundur Benediktsson skoruðu mörk KR-liðsins sem var manni fleiri frá 29. mínútu leiksins. KR-ingar voru þarna ríkjandi bikarmeistarar en töpuðu síðan fyrir ÍBV í undanúrslitunum.

Valsmenn hafa síðan á móti slegið KR-ingar út úr bikarnum í tvö síðustu skipti sem liðin hafa mæst á KR-vellinum, unnu 2-1 í átta liða úrslitum 2005 og 3-0 í vítakeppni í sextán liða úrslitum 2007.