Umfjöllun: Sigurbjörn tryggði Val sigur á KA

Sigurbjörn Örn Hreiðarsson var hetja Valsmanna er hann tryggði sínum mönnum 3-2 sigur á KA með marki í lok framlengingarinnar. Þetta var leikur í 16-liða úrslitum bikarkeppni karla en staðan að loknum venjulegs leiktíma var 2-2.

Valsmenn komust tvívegis yfir í leiknum með mörkum Helga Sigurðssonar og Marel Baldvinssonar. En þeir David Disztl og Andri Fannar Stefánsson jöfnuðu fyrir KA. Staðan var 1-1 í hálfleik.

Leikurinn byrjaði nokkuð fjörlega en bæði lið áttu ágætar sóknir. Á 12. mínútu komust heimamenn í góða sókn er Baldur Aðalsteinsson bar upp boltann á hægri kantinum og gaf inn á teiginn. Þar náði Marel Baldvinsson að taka niður boltann og leggja hann laglega fyrir Helga sem stýrði boltanum í markhornið. Einkar lagleg sókn hjá Valsmönnum.

Eftir þetta fékk Valur nokkur efnileg færi hefðu auðveldlega getað skorað fleiri mörk í fyrri hálfleik.

Það dró hins vegar af gestunum að norðan eftir því sem á leið fyrri hálfleikinn og gekk þeim lítið gegn sterkri vörn Valsmanna.

Þar til á 43. mínútu. KA fékk aukaspyrnu á miðjum vallarhelmingi Vals. Haukar Heiðar Hauksson gaf háa sendingu inn á teig. Haraldur Björnsson í marki Vals misreiknaði sendinguna og náði David Disztl að skalla yfir hann í autt markið.

En þó svo að markið hafi komið gegn gangi leiksins mættu KA-menn mun sterkari til leiks í síðari hálfleik og sóttu grimmt. Besta færið fékk Guðmundur Óli Steingrímsson sem átti skalla að marki af stuttu færi eftir fyrirgjöf Dean Martin. Haraldur Björnsson varði hins vegar vel í marki Vals.

En stuttu síðar var aftur skorað gegn gangi leiksins. Helgi Sigurðsson gerði vel á hægri kantinum og lék á einn leikmann KA. Hann kom boltanum út í teig, á Baldur Aðalsteinsson sem átti fasta sendingu fyrir markið. Marel var mættur á fjarstöng og skoraði í autt markið.

En KA-menn gáfust ekki upp og héldu áfram að sækja. Miðvallarleikmaðurinn efnilegi, Andri Fannar Stefánsson, fékk boltann á 61. mínútu rétt utan víteigs og lét vaða að marki. Boltinn hafði viðkomu í varnarmanni Vals en hafnaði svo í netinu. Laglegt skot sem Haraldur náði ekki að verja.

Eftir þetta fóru Valsmenn fyrst að láta til sín taka á nýjan leik en síðari hálfleikurinn hafði verið eign gestanna fram að því. Marel fékk gott færi í víteteignum en skaut yfir. Síðar komst varamaðurinn Guðmundur Steinn Hafsteinsson í ágæt færi í tvígang en skaut í bæði skiptin í stað þess að gefa á félaga sína sem voru í betri stöðu en hann.

Helgi Sigurðsson fékk svo tækifæri til að tryggja Valsmönnum sigurinn í lok venjulegs leiktíma en Sandor Matus sá vel við honum.

Bæði lið fengu fín færi í fyrri hálfleik framlengingarinnar. Viktor Unnar Illugason komst í gott skotfæri hjá Val en skaut framhjá. Þá átti Bjarni Ólafur Eiríksson gott skot að löngu færi en það var varið í horn.

Besta færið fengu þó leikmenn KA. Fyrst átti Disztl lúmskt skot með bakfallsspyrnu sem Haraldur varði með naumindum. Í kjölfarið fékk Andri Fannar kjörið skotfæri í teignum en hitti ekki rammann.

Valsmenn sóttu stíft í síðari hálfleik framlengingarinnar og áttu margar ágætar marktilraunir. Lukkudísirnar virtust einfaldlega ekki á þeirra bandi. Til að mynda kom Marel Baldvinsson skoti framhjá Matus í marki KA en þá varði Haukur Heiðar Hauksson á línu.

En á 117. mínútu kom loksins sigurmarkið. Sigurbjörn Hreiðarsson fékk þá boltann rétt utan vítateigs eftir ágætan undirbúning Bjarna Ólafs. Sigurbjörn átti glæsilegt skot að marki sem Matus náði ekki að verja og þar við sat.

Valur - KA 3-2

1-0 Helgi Sigurðsson (11.)

1-1 David Disztl (43.)

2-1 Marel Baldvinsson (56.)

2-2 Andri Fannar Stefánsson (61.)

3-2 Sigurbjörn Örn Hreiðarsson (117.)

Vodafone-völlurinn. Áhorfendur: 592.

Dómari: Kristinn Jakobsson

Skot (á mark): 29-9 (11-5)

Varin skot: Haraldur 3 - Matus 8.

Horn: 9-4

Aukaspyrnur fengnar: 19-17

Rangstöður: 3-3

Valur (4-4-2):

Haraldur Björnsson

Ian Jeffs (gult)

Reynir Leósson

Atli Sveinn Þórarinsson

Bjarni Ólafur Eiríksson

Baldur Aðalsteinsson

(56. Ólafur Páll Snorrason)

(62. Viktor Unnar Illugason) (gult)

Sigurbjörn Örn Hreiðarsson (gult)

Baldur Bett (gult)

Pétur Georg Markan

(64. Guðmundur Steinn Hafsteinsson)

Helgi Sigurðsson

Marel Baldvinsson

KA (4-5-1):

Sandor Matus

Haukur Heiðar Hauksson

Norbert Farkas

Þórður Arnar Þórðarson

Hjalti Már Hauksson

Guðmundir Óli Steingrímsson

(106. Orri Gústafsson)

Arnar Már Guðjónsson

Srdjan Tufegdzig

Andri Fannar Stefánsson

Dean Martin

(91. Ingi Freyr Hilmarsson)

David Disztl