Serena Williams komst áfram á Opna franska

Hin bandaríska Serena Williams átti ekki í miklum vandræðum með að tryggja sér farseðilinn í átta-manna úrslitum á Opna franska mótinu í tennis í dag en það gerði hún eftir öruggan sigur gegn Aleksöndru Woniak í tveimur settum, 6-1 og 6-2.

Serena mætir Svetlönu Kuznetsovu í átta-manna úrslitum en Serena er eini fyrrum sigurvegari mótsins, vann árið 2002, sem er enn með í mótinu.

Hjá körlunum áttu sér stað heldur óvænt úrslit í gær þegar Spánverjinn Rafael Nadal tapaði gegn Svíanum Robin Soderling í fjögurra setta rimmu. Soderling, 24 ára gamall, var að vinna Nadal í fyrsta skiptið af fjórum viðureignum þeirra og hann batt einnig endann á ótrúlegt met Nadal sem hafði ekki tapað leik á Opna franska mótinu og unnið það í öll fjögur skiptin sem hann tók þátt í því.