Adriano: Ég mætti fullur á æfingar hjá Inter

Brasilíumaðurinn Adriano var í algjörri óreglu síðustu tímabil sín með ítalska liðinu Inter Milan en hann náði aldrei að ná tökum á drykkju sinni þrátt fyrir að Jose Mourinho hafi gert allt til að hjálpa honum. Adriano hefur nú viðurkennt að hafa mætt fullur á æfingar hjá Inter.

„Ég fór mjög langt niður þegar ég missti föður minn og það eina sem hjálpaði mér í þunglyndinu var áfengið. Ég var bara ánægður þegar ég drakk og ég gat ekki hætt. Ég fór út á lífið á hverju kvöldi og sturtaði í mig öllu sem ég komst í tæri við, vín, viskí, bjór... full af bjór," sagði Adriano í viðtali við brasilíska blaðið R7. Adriano missti föður sinn árið 2004 en hann fékk hjartaáfall.

„Ég mætti alla daga fullur. Ég gat ekki sofið af ótta við að mæta of seint en þegar ég mætti var ekki runnið af mér. Þeir sendu mig heima til að sofa úr mér en sögðu blaðamönnum að ég glímdi við tognun á vöðva," sagði Adriano.

„Ég kom aftur til Inter bara vegna Mourinho, en það var ekki nóg. Ég byrjaði aftur að halda partí með konum og áfengi. Félagið vildi ekki sætta sig við ástandið og gafst upp á að bíða eftir að ég næði mér upp úr þessu," sagði Adriano.

Adriano sem er 27 ára gamall spilar núna með æskufélagi sínu Flamengo í Brasilíu þar sem hann hefur skorað 13 mörk í fyrstu 20 leikjum sínum. Hann skoraði 48 mörk í 123 leikjum á sínum tíma með Inter.