Sjálfstraust Daly fokið burt með aukakílóunum?

Kylfingurinn skrautlegi John Daly átti vægast sagt vondan dag á Opna-Buick mótinu í gær þegar hann lék á 88 höggum en það er hans versta skor á löngum atvinnumannaferli.

Daly hefur lést mikið eða um rúm 35 kíló á nokkrum mánuðum og svo virðist sem að sjálfstraustið hafi fokið burt með aukakílóunum.

Daly var langt frá því að komast í gegnum niðurskurðinn á mótinu og var að vonum vonsvikinn eftir herlegheitin.

„Þetta var ótrúlegt. Ég bara gat ekki stjórnað höndunum í sveiflunni og vissi ekkert hvert boltinn myndi fara. Ég hafði bara enga tilfinningu fyrir mínum leik og það var óþægileg tilfinning. Ég er að leggja mjög hart að mér til þess að bæta minn leik en það er bara ekki að skila sér inn á golfvöllinn," segir Daly.