Arsenal með ungan Ítala undir smásjánni

U-21 árs landsliðsmaðurinn Angelo Ogbonna sem leikur með ítalska b-deildarfélaginu Torino er eftirsóttur þessa dagana en varnarmaðurinn hefur til að mynda verið orðaður við Inter og Juventus undanfarið.

Þá hafa hæfileikar Ogbonna samkvæmt ítölskum fjölmiðlum ekki farið framhjá knattspyrnustjóranum Arsene Wenger hjá Arsenal og talið er að Lundúnafélagið sé komið í kapphlaupið að fullu. Leikmaðurinn er sjálfur meðvitaður um áhuga annarra félaga á sér.

„Ég veit nákvæmlega hvað ég vill og mun ekki loka hurðinni á neitt félag. Ég vill bara halda áfram að bæta leik minn til þess að komast eins langt og ég mögulega get," er haft eftir Ogbonna.