Mourinho neitar að hafa gefið viðtal

Þótt ótrúlegt megi virðast þá er Jose Mourinho með talsmann þó svo hann tali mikið sjálfur. Að sögn talsmannsins talaði Mourinho þó ekki við spænska blaðið El Mundo Deportivo á dögunum.

Blaðið birti viðtal við Mourinho þar sem hann lýsti því yfir að Inter myndi leggja Barcelona að velli í Meistaradeildinni. Talsmaðurinn segir að þetta viðtal sé uppspuni frá rótum.

Talsmaðurinn segir að Portúgalinn hressi muni aðeins tjá sig um leikina við Barcelona á skipulögðum blaðamannafundum í kringum leikina.

Mikil eftirvænting er fyrir leikina og sérstaklega í ljósi þess að aðalstjarna Inter síðustu ár, Zlatan Ibrahimovic, er nú í röðum Barca.