Feðgarnir unnu báðir upp mikið forskot á lokakaflanum

Ólafur Björn Loftsson úr Nesklúbbnum fylgdi í gær í fótspor föður síns og varð Íslandsmeistari í golfi eftir stórkostlega spilamennsku á lokasprettinum. Ólafur Björn fékk fimm fugla í röð, á fjórum síðustu holunum og þeirri fyrstu í umspili, og Nesklúbburinn eignaðist sinn fyrsta meistara í 37 ár.

Loftur Ólafsson, faðir Ólafs, vann Íslandsmeistaratitilinn í Grafarholtinu 1972 þegar hann var 19 ára gamall en hann átti einnig þátt í þessum titli sonar síns því hann var kylfusveinn stráksins sem verður 22 ára gamall í næsta mánuði.

Þegar lokahringur feðganna er borinn saman kemur í ljóst að báðir þurftu þeir að vinna upp mikið forskot á lokasprettinum til þess að tryggja sér Íslandsmeistaratitilinn.

Árið 1972 var Loftur Ólafsson fjórum höggum á eftir Björgvini Þorsteinssyni þegar þeir höfðu spilað þrettán fyrstu holurnar á fjórða hringnum. Loftur vann upp fjögur högg á næstu holum og tryggði sér að lokum tveggja högga forskot.

Ef umspilið í ár er talið með þá spiluðu báðir feðgarnir sex höggum betur en aðalkeppninautar þeirra á síðustu fimm holunum. Hér fyrir neðan má sjá hvernig staðan breyttist á lokaholunum hjá þeim báðum.

Samanburður á Íslandsmótinu í höggleik 1972 og 2009

Fyrir lokadag

1972 Loftur Ólafsson var með 4 högga forskot fyrir lokadaginn

2009 Ólafur Björn Loftsson var einu höggi á eftir fyrir lokadaginn

Eftir 13. holu

1972 Björgvin Þorsteinsson átti 4 högg á Loft Ólafsson

2009 Stefán Már Stefánsson átti 4 högg á Ólaf Björn Loftsson

Eftir 14. holu

1972 Björgvin +2

2009 Stefán Már +4

Eftir 15. holu

1972 Jafnir

2009 Stefán Már +3

Eftir 16. holu

1972 Jafnir

2009 Stefán Már +2

Eftir 17. holu

1972 Loftur +1

2009 Stefán Már +1

Eftir 18. holu

1972 Loftur +2

2009 Jafnir - umspil

Eftir umspil

2009 Ólafur +2

Íslandsmeistari 1972 - Loftur Ólafsson

Íslandsmeistari 2009 - Ólafur Björn Loftsson