Veðurguðirnir í Wales hafa enn áhrif á Ryderkeppnina í golfi

Fjögurra daga Ryderkeppni í golfi verður á meðal þeirra hugmynda sem ræddar verða á stjórnarfundi PGA - og Evrópumótaraðarinnar í byrjun næsta árs.

Keppnishaldið á Celtic Manor vellinum í Wales fór sem kunnugt er allt úr skorðum vegna úrkomu þegar keppni fór þar fram í byrjun október og þurfti að bæta við fjórða keppnisdeginum til þess að hægt væri að ljúka keppni. Svo virðist sem að þessi óvænta breyting hafi vakið forsvarsmenn keppninnar til umhugsunar.

„Því er ekki að leyna að það voru margir sem voru ánægðir með þessa breytingu," segir Richard Hills framkvæmdastjóri keppninnar. „Við munum ræða við kylfinga úr báðum liðum í janúar á næsta ári og við munum halda áfram að ræða þessa hluti á fundi samhliða Masterskeppninni í apríl," bætti Hills við en hann telur góðar líkur á því að keppnisfyrirkomulaginu verði breytt fyrir næstu keppni sem fram fer á Medinah vellinum í Chicago árið 2012.

Það eru margir sem eru á móti því að breyta keppnisfyrirkomulaginu sem hefur fylgt þriggja daga keppni. Helstu rök þeirra eru að mikil ákefð og spenna einkenni þriggja daga keppnina, hlutverk fyrirliðans í þriggja daga keppni er mun stærra og erfiðara þar sem hann þarf ávallt að velja átta kylfigna fyrir hverja umferð og setja fjóra á „varamannabekkinn".

Þeir sem eru fylgjandi því að breyta keppnisfyrirkomulaginu benda hinsvegar á að keppnin hafi ekki misst sérkenni sín þrátt fyrir fjögurra daga keppni í Wales. Að auki benda þeir á að fjögurra daga keppni leysi úr ýmsum vandamálum sem fylgir því að leika tvöfalda umferð fyrstu tvo keppnisdagana þar sem að það stendur ávallt tæpt að kylfingar nái að ljúka leik síðdegis áður en myrkrið skellur á.

Og ekki má gleyma því að mótshaldarar geta gert ráð fyrir mun meiri veltu og hagnaði af þriðja stærsta íþróttviðburði heims ef hann stendur yfir í fjóra daga en ekki þrjá.

Þeir sem styðja fjögurra daga keppnisfyrirkomulagið benda einnig á að mikil örtröð skapist ávallt þegar 40.000 áhorfendur mæta kl. 7.30 að morgni þegar keppni hefst. Sú örtröð myndi minnka verulega að þeirra mati ef keppnin stæði yfir í fjóra daga - þar sem keppnin myndi ekki hefjast fyrr en kl. 9.

Ef keppnisfyrirkomulagin verður breytt er líklegt að á fyrsta keppnisdegi fari fram fimm eða sex fjórleikir (betri bolti).

Á öðrum degi verði leikinn hefðbundinn „Ryderdagur" þar sem að fjórir fjórmenningar (tveir keppendur eru saman í liði og slá þeir einn bolta til skiptis) fara fram fyrir hádegi og sami háttur verður á eftir hádegi.

Á þriðja keppnisdegi verður sama fyrirkomulag og á þeim fyrsta, og á fjórða keppnisdegi fara fram 12 tvímenningsleikir þar sem einn kylfingur úr hvoru liði keppa í holukeppni sín á milli.