Hönnuðurinn Linda Björg Árnadóttir hefur gert fatalínu sem hún lýsir frekar sem heimafatnaði heldur en tísku. Linda hefur um tíma hannað undir heitinu Scintilla og samanstendur nýja fatalínan meðal annars af hlýrabolum, kjólum, leggings og háum sokkum úr hundrað prósent silki og fæst hún í tískuversluninni Kron Kron.
„Ég er bæði fata- og textílhönnuður og er með merki sem kallast Scintilla og er heimilistextíll. Nýja línan passar vel inn í það auk þess sem þetta var góð leið fyrir mig til að gera línu sem væri ekki árstíðatengd eins og flest annað í tískuheiminum. Með þessu þarf ég ekki að koma með tvær nýjar línur árlega heldur get ég bætt við þessa hægt og rólega," útskýrir Linda Björg. Hún segir flíkurnar vera klassískar og því geti fólk notað þær ár eftir ár án þess að þær fari úr tísku. Eins og er fást flíkur aðeins í svörtu og hvítu en að sögn Lindu Bjargar mun brátt bætast í litaflóruna.
„Ég er mjög ánægð með þær vörur sem komnar eru. Nú ætla ég að fara að bæta við og stækka línuna auk þess sem ég er að vinna í því að koma vörunum í sölu á fleiri stöðum bæði hér heima og erlendis."
Hægt er að skoða vörur Scintilla á heimasíðu fyrirtækisins, scintillalimited.com. - sm
