Carvalho kominn til Real Madrid

Spænska stórliðið Real Madrid hefur formlega gengið frá kaupunum á portúgalska miðverðinum Ricardo Carvalho frá Chelsea.

Þessi 32 ára gamli varnarmaður kemur til félagsins fyrir 6,7 milljónir punda. Hann skrifaði undir tveggja ára samning við spænska liðið.

"Mig hefur lengi langað að spila fótbolta með þessu félagi. Mourinho er þjálfari sem kann þá list að sigra og ég er að koma til félags sem mun vinna titla," sagði Carvalho en Mourinho, þjálfari Real, fékk hann til Chelsea á sínum tíma.

"Það er annar hraði í fótboltanum hér. Enski boltinn er hraðar. Það verður því auðveldara fyrir mig að venjast boltanum hér en á Englandi. Spænski boltinn er líka líkari þeim portúgalska þannig að ég hef ekki miklar áhyggjur af þessu."

Carvalho er fimmti leikmaðurinn sem kemur til félagsins í sumar. Hinir eru Sami Khedira, Pedro Leon, Angel di Maria og Sergio Canales.