Moratti: Benitez öruggur í starfi

Massimo Moratti, forseti Evrópumeistara Inter, segir að Rafa Benitez sé öruggur í starfi sínu sem knattspyrnustjóri liðsins þrátt fyrir slæma stöðu þess í ítölsku úrvalsdeildinni.

Moratti sagði meira að segja að staða Benitez myndi ekki breytast jafnvel þótt að Inter myndi tapa fyrir FC Twente á heimavelli er liðin mætast í Meistaradeild Evrópu í vikunni.

Inter tapaði, 2-1, fyrir Chievo um helgina og er nú í sjötta sæti ítölsku úrvalsdeildarinnar, níu stigum á eftir toppliði AC Milan.

„Við verðum að ná góðum úrslitum á miðvikudaginn þar sem að leikurinn er mikilvægur," sagði Moratti við ítalska fjölmiðla í dag. „Þjálfarinn og leikmenn verða að gera sér grein fyrir mikilvægi leiksins."

„En það er ánægjulegt að hvorki leikmenn né félagið sjálft hafa ekki sýnt nein merki þess að þeir hafi misst trúna á Benitez," sagði Moratti enn frekar.