Lífstíðarfangelsi fyrir að bana 15 mánaða gömlu barni

Gary Alcock, 28 ára gamall breskur karlmaður, hefur verið dæmdur í lífstíðarfangelsi fyrir að hafa myrt fimmtán mánaða gamla dóttur kærustu sinnar. Árásin er rakin til þess að grátur barnsins truflaði Alcock á meðan að hann var að leika sér í Xbox leikjatölvu.

Barnið hlaut alvarlega innvortis áverka, brotin rifbein og heilaskemmdir við árásina. Móðir barnsins, Claire Flanagan, horfði á árásina en aðhafðist ekkert vegna þess að hún var hrædd um að samband sitt við kærastann færi út um þúfur. Móðirin var sýknuð af ákæru um morð en hlaut fimm ára fangelsisdóm fyrir að hafa ekki komið barninu til varnar.

Við réttarhöldin kom fram að barnið hafði þrisvar sinnum orðið fyrir árás á nokkurra vikna skeiði áður en barnið lést. Um 35 áverkar fundust á barninu eftir að það lést, samkvæmt frásögn Sky fréttastöðvarinnar.