Morðið í Hafnarfirði: Manninum sleppt úr haldi

Lögreglan leggur ekki fram kröfu um gæsluvarðhald yfir manninum sem handtekinn var í gær og hefur verið í haldi lögreglunnar vegna rannsóknar á morðinu í Hafnarfirði um helgina. Maðurinn er á þrítugsaldri.

Eins og fram hefur komið fannst hinn látni á heimili sínu um hádegisbil á sunnudag en hann virðist hafa verið stunginn með eggvopni oftar en einu sinni.

Í tilkynningu frá lögreglunni kemur fram að rannsókn málins haldi áfram en á fjórða tug lögreglumanna vinni að henni. Fjölmargir hafi verið yfirheyrðir og þeirri vinnu sé ekki lokið. Tæknirannsókn á vettvangi er langt komin og önnur gagnaöflun í fullum gangi. Fjöldi ábendinga hafa borist frá almenningi og verið er að vinna úr þeim eftir því sem tilefni er til.