Morðingi James litla var með barnaklám

Ástæðan fyrir því að Jon Venables, annar þeirra sem myrti James litla Bulger, árið 1993 var handtekinn í lok febrúar þegar hann braut skilorð voru ásakanir um vörslu barnakláms. Breskir fjölmiðlar greindu frá þessu í gær en yfirvöld hafa ekki viljað staðfesta af hverju Venables var handtekinn.

Venables og Robert Thompson myrtu Bulger þegar þeir voru einungis tíu ára gamlir. Þeir voru dæmdir í fangelsi en fengu lausn á skilorði árið 2001.

Denise Fergus, móðir Bulgers, hefur gagnrýnt yfirvöld harðlega vegna málsins sem hún segir að haldi hlífiskildi yfir Venables og meðhöndli hann eins og stórstjörnu.