Garcia heitur en Tiger kaldur

Sergio Garcia spilaði sinn besta golfhring á árinu er hann lék annan hringinn á opna ástralska meistaramótinu á 65 höggum. Hann er sex höggum á eftir efsta manni, Adam Bland.

"Það var frábært að spila á 65 höggum en ég hefði getað gert enn betur því ég var að slá frábærlega," sagði Garcia sem hefur ekki unnið mót síðan árið 2008.

Hann tók sér smá frí frá golfiðkun á þessu ári og fríið virðist hafa gert honum gott.

Tiger Woods mun líklega ekki verja titil sinn á mótinu en hann er nú níu höggum á eftir Bland. Tiger hefur ekki unnið mót á þessu ári.

Það var mjög hvasst á öðrum hring og Tiger viðurkenndi að vindurinn hefði farið illa í sig.