15 ára sigurvegari á Hellu

Hin 15 ára gamla Sunna Víðisdóttir stimplaði sig inn í íslenskt kvennagolf með eftirminnilegum hætti í dag er hún sigraði á Egils Gull-mótinu sem fram fór á Strandavelli á Hellu.

Sunna lék hringina tvo á samtals níu yfir pari og átti tvö högg á þær Nínu Björk Geirsdóttur og Berglindi Björnsdóttur sem urðu i öðru sæti.

Sunna leiddi eftir gærdaginn og þessi bráðefnilega stelpa sýndi stáltaugar í dag er hún hélt forskotinu allt til enda þó svo reynslumeiri kylfingar hefðu sótt að henni.