Mikil spenna fyrir lokadaginn - Sigmundur Einar með forustu

Sigmundur Einar Másson úr Golfklúbbi Kópavogs og Garðabæjar er með eins högg forskot fyrir lokadaginn á Íslandsmótinu í höggleik sem fram fer á Kiðjabergsvellinum. Það er mikil spenna í mótinu enda þrír næstu menn aðeins einu höggi á eftir Sigmundi.

Sigmundur Einar Másson úr GKG hefur leikið fyrstu þrjá dagana á parinu en þeir Birgir Leifur Hafþórsson úr GKG, Heiðar Davíð Bragason úr GHD og Hlynur Geir Hjartarson úr GK koma síðan jafnir í 2. til 4. sæti aðeins einu höggi á eftir.

Sigmundur Einar hefur leikið alla þrjá hringina til þessa á pari en hann var með þrjá fugla, einn örn og fimm skolla á hringnum í dag. Heiðar Davíð hafði einni verið á parinu fyrstu tvo dagana en lék nú á einu höggi yfir pari.

Birgir Leifur Hafþórsson hafði tveggja högga forskot á þá Heiðar Davíð úr GHD og Sigmund Einar fyrir daginn í dag. Birgir Leifur lék fyrstu níu holurnar á einu höggi undir pari eftir að hafa náð erni á sjöttu holunni. Hann fékk aftur á móti fjóra skolla á seinni níu holunum en náði að bæta stöðu sína með því að fá fugl á 18. holunni.

Hlynur Geir Hjartarson lék á einu höggi undir pari í dag eftir að hafa fengið tvo fugla á síðustu fjórum holunum. Hann var alls með fjóra fugla og þrjá skolla í dag.

Staða efstu manna í Íslandsmóti í höggleik fyrir lokadaginn:

1. Sigmundur Einar Másson par

2. Birgir Leifur Hafþórsson +1

2. Heiðar Davíð Bragason +1

2. Hlynur Geir Hjartarson +1

5. Örvar Samúelsson +3

5. Þórður Rafn Gissurarson +3

7. Guðmundur Ágúst Kristjánsson +5

7. Kristján Þór Einarsson +5

9. Alfreð Brynjar Kristinsson +7

9. Stefán Már Stefánsson +7

11. Sigurpáll Geir Sveinsson +8

11. Örn Ævar Hjartarson +8

13. Arnór Ingi Finnbjörnsson +9

14. Birgir Guðjónsson +10

15. Axel Bóasson +11