E-label selt í stærstu vefverslun Bretlands

Íslenska merkið E-label hefur hafið samstarf við vefverslunina Asos.com og verður fáanlegt á síðunni frá og með janúarmánuði. Asos er stærsta vefverslun Bretlands og á hverjum mánuði heimsækja yfir átta milljónir manna síðuna.

„Þeir eru búnir að taka inn pöntun frá okkur sem ætti að vera komin í sölu einhvern tímann í janúar. Þeir byrja á því að taka inn línurnar sem komu út á þessu ári og svo bætist vonandi við það í framtíðinni," útskýrir Ásta Kristjánsdóttir, sem rekur E-label ásamt Hebu Hallgrímsdóttur.

Undanfarið hafa þær unnið markvisst að því að koma merkinu að í verslunum í Bretlandi og Þýskalandi og virðist sú vinna vera að skila sér núna.

„Netsala hefur aukist gífurlega alls staðar í heiminum og við erum því mjög ánægðar að hafa komist inn hjá Asos. Í gegnum þá náum við til markhóps sem við myndum kannski ekki hafa náð til annars, auk þess er það mjög góð auglýsing og kynning fyrir merkið að hafa fengið að tengjast Asos-síðunni."

Ásta segir þær stöllur þó fara sér hægt þegar kemur að auknum markaðsyfirráðum. „Við tökum bara eitt spor í einu þegar kemur að því að stækka við okkur. Við höfum farið varlega og passað upp á að fara að engu óðslega, ætli það megi ekki segja að við séum mjög íhaldssamar þegar kemur að þessum málum," segir Ásta og hlær. Auk þess að sölsa Bretlandsmarkað undir sig hafa stúlkurnar haldið innreið sína á Þýskalandsmarkað, sem Ásta segir vera engu minna spennandi verkefni. „Það eru spennandi tímar fram undan en í bili ætlum við að einbeita okkur að því að sinna þessu verkefni eins vel og við getum."- sm