Evrópa vann Ryder-bikarinn

Keppnislið Evrópu vann í dag lið Bandaríkjanna í Ryder-keppninni í golfi með minnsta mögulega mun - fjórtán og hálfum vinningi gegn þrettán og hálfum.

Það var Norður-Írinn Graeme McDowell sem tryggði Evrópu sigurinn með því að vinna síðustu viðureignina í einlilðaleiknum, gegn Hunter Mahan.

McDowell náði afar mikilvægum fugli á sextándu holu er hann setti niður fimm metra pútt og náði þar með tveggja stiga forystu gegn Mahan þegar tvær holur voru eftir.

Hefði Mahan náð að jafna McDowell að stigum og þar með hálfum vinningi hefði niðurstaðan orðið jafntefli, 14-14. En þar sem Bandaríkin er núverandi handhafi titilsins hefði liðið haldið honum með jafntefli.

En McDowell tryggði sigurinn á sautjándu holu og út braust gríðarlegur fögnuður meðal leikmanna og stuðningsmanna Evrópuliðsins.

Evrópa hóf leikinn í dag með þriggja vinninga forystu og þurftu því fimm og hálfan vinning úr síðustu tólf viðureignunum sem eftir voru þegar keppni hófst.

Bandaríska liðið náði hins vegar að jafna metin þegar að Rickie Fowler náði fjórum fuglum á síðustu fjórum holunum í sinni viðureign gegn Edoardo Molinari. Þar með jafnaði hann metin í 13,5-13,5.

En sem fyrr segir náði McDowell, sem fagnaði sigri á opna bandaríska meistaramótinu í ár, að tryggja Evrópuliðinu titilinn með sigri í lokaviðureign keppninnar.

Þetta er mikill sigur fyrir Skotann Colin Montgomerie sem var fyrirliði evrópska liðsins í ár.