Tiger klökkur yfir móttökunum sem hann hefur fengið

Tiger Woods situr fyrir svörum á blaðamannafundi fyrir Masters mótið en hann stendur yfir.

Á fundinum sagði Tiger að síðustu ár hafi verið mjög erfið fyrir fjölskyldu sína. Hann væri þó klökkur yfir þeim móttökum sem hann hefur fengið á Augusta-vellinum.

Hann vildi þakka þeim aðdáendum sínum sem hafa sýnt honum stuðning í gegnum árin. „Það er ótrúlegt að fólk skuli enn fagna mér eftir þau stóru mistök sem ég hef gert. Ég veit að margir hérna eru vinir mínir og verða alltaf vinir mínir," sagði Tiger.

Blaðamenn skutu ekki eins fast að Tiger eins og búist var við. „Ég þurfti að endurskoða mín mál," sagði hann spurður út í meðferðina sem hann fór í vegna kynlífsfíknar sinnar. Hann segist vera betri maður eftir meðferðina.

„Ég ætla að reyna að minnka neikvætt umtal með frammistöðu á golfvellinum."