Tileinkaði sigurinn eiginkonu sinni

Kylfingurinn Phil Mickelson tileinkar sigurinn á Masters eiginkonu sinni sem glímt hefur við brjóstakrabbamein.

„Mér líður frábærlega. Ég gæti haldið endalaust áfram og sagt af hverju en þetta er mjög sérstakur dagur fyrir mig," sagði Mickelson eftir að hafa tryggt sér sigurinn.

„Þetta hefur verið tilfinningaþrungið ár. Ég er mjög stoltur af konunni minni og þeirri baráttu sem hún hefur gengið í gegnum. Þessi sigur er einn besti hlutur sem við höfum fengið."

Amy, eiginkona hans, var meðal áhorfenda þegar hann tryggði sér sigurinn. „Ég er einstaklega ánægður með að hún hafi verið þarna. Að hafa Amy og börnin með mér á þessari stundu er ólýsanlegt," sagði Mickelson.