Ólafía Þórunn: Sautján ára og búin að vera efst allt mótið

Ólafía Þórunn Kristinsdóttir úr GR hefur staðið sig frábærlega á Íslandsmótinu í höggleik á Kiðjabergsvelli og er með eins högg forskot fyrir lokahringinn. Ólafía sýndi mikinn styrk í lokin á þriðja hringnum í dag þegar hún lék þrjár síðustu holurnar á tveimur höggum undir pari og náði aftur forustunni í mótinu.

Ólafía Þórunn er á samtals fimmtán höggum yfir pari og hefur haldið forystunni alla þrjá hringina en hún var með þriggja högga forskot eftir bæði 18 og 36 holur. Tinna er á 16 höggum yfir pari og Signý á 18 höggum yfir pari. Það stefnir því í spennandi lokahring hjá stúlkunum á morgun.

Ólafía Þórunn sagðist ekki vera nægilega ánægð með hringinn í viðtali á heimasíðu Golfklúbbs Kiðjabergs í dag en hún talaði um að hún hafi ekki verið að leika sitt besta golf.

„En ég endaði hringinn vel og er ánægð með það. Það er ekkert annað í stöðunni en að reyna að vinna á morgun. Ég veit að ég get gert betur en í dag og ætla mér það. Allar aðstæður voru frábærar í dag, völlurinn og veðrið eins og best verður á kosið," sagði Ólafía Þórunn eftir hringinn.