Nike ætlar að standa með Tiger

Íþróttavörurisinn Nike hefur ákveðið að standa við bakið á Tiger Woods þrátt fyrir alla framhjáhaldsskandalana.

Forseti Nike, Charlie Denson, vill aftur á móti ekki sjá Tiger aftur á golfvellinum fyrr en hann sé búinn að taka til heima hjá sér.

Kreppan hefur komið illa við söluna á golfvörum Nike og fyrirtækið sér væntanlega ekki fram á að halda dampi þar nema með Tiger innanborðs.

Tvö fyrirtæki, AT&T og Accenture, hafa þegar slitið samstarfssamningum við Tiger en Gillette og úraframleiðandinn Tag Heuer hafa dregið úr auglýsingum með kylfingnum.