Framtíð Mourinho ákveðin eftir tímabilið

Gabriele Oriali, yfirmaður íþróttamála hjá Inter á Ítalíu, segir að framtíð knattspyrnustjórans Jose Mourinho ráðist að tímabilinu loknu.

Inter hefur þegar tryggt sér ítalska bikarmeistaratitilinn og getur orðið deildarmeistari nú um helgina er liðið mætir Siena.

Svo um næstu helgi mætir Inter liði Bayern München frá Þýskalandi í úrslitum Meistaradeildar Evrópu.

Oriali sagði að félagið vildi halda Mourinho en að framtíðin væri óráðin. „Ég veit það ekki. Hann mun ákveða sig eftir tímabilið og ræða þá við forseta félagsins [Massimo Moratti]."

„Ég vona persónulega að hann haldi áfram að byggja upp liðið eins og hann hefur gert síðustu tvö ár. Það eina sem hefur vantað hjá félaginu er árangur í Evrópukeppninni og hann hefur nú náð því."