Ranocchia til Inter

Inter hefur gengið endanlega frá kaupum á varnarmanninum Andrea Ranocchia frá Genoa fyrir tólf milljónir evra.

Mál Ranocchia eru reyndar flókin þar sem að Genoa og Inter sameinuðust um að kaupa leikmanninn frá Bari síðasta sumar.

Samkvæmt samkomulaginu átti Ranocchia að leika með Genoa þetta tímabilið en eftir góða frammistöðu hans í haust ákvað Inter að ganga endanlega frá kaupunum og greiddi Genoa tólf milljónir evra fyrir.

Inter hefur átt í erfiðleikum í haust og er í sjöunda sæti deildarinnar með 23 stig eftir fimmtán leiki. Liðið hefur tapað þremur af síðustu fjórum deildarleikjum sínum og á dögunum var Rafael Benitez rekinn frá félaginu og Brasilíumaðurinn Leonardo ráðinn í hans stað.