Sigmundur Davíð: Ríkisstjórnin ræðir að hækka matarskatt

„Í dag fékk ég staðfest eftir mjög áreiðanlegum heimildum að það sé raunverulega til umræðu í fullri alvöru innan ríkisstjórnarinnar að hækka virðisaukaskatt á matvæli," segir Sigmundur Davíð Gunnlaugsson, þingmaður og formaður Framsóknarflokksins, í pistli sem birtist á heimasíðu hans í kvöld.

Hann segir að það séu skelfilegar fréttir og bendir á að almennur virðisaukaskattur sé nú þegar sá hæsti í heiminum á Íslandi og skattar á almenning séu fyrir löngu komnir yfir þolmörk heimilanna.

„Það er löngu sannað að skattahækkanir á matvæli koma verst við þá sem lægst hafa launin og þegar virðisaukaskattur á matvæli var lækkaður á sínum tíma skipti það mjög miklu máli fyrir fjárhag heimilanna. Að hækka virðisaukaskatt á matvæli í þeirri stöðu sem nú ríkir er hrein aðför að láglaunafólki. Þetta er rangt og þetta verður að stöðva, segir Sigmundur Davíð.

Hægt er að lesa pistil Sigmundar Davíðs hér.