Ragna vann Iceland International í fimmta sinn

Ragna Ingólfsdóttir tryggði sér áðan sigur í einliðaleik kvenna á Iceland International mótinu í badminton sem stendur yfir í íþróttahúsi TBR við Gnoðarvog. Sigur Rögnu á þessu móti gefur henni mikilvæg stig í baráttunni við að komast inn á Ólympíuleikana í London á næsta ári.

Ragna vann Akvile Stapusaityte frá Litháen í úrslitaleiknum sem fór alla leið í oddalotu. Ragna vann 21-18, 17-21 og 21-17.

Ragna er númer 65 á heimslistanum en Stapusaityte er númer 105. Ragna hefur þrisvar áður keppt við þá litháensku og unnið hana í öll skiptin.

Þetta er í fimmta skipti sem Ragna vinnur mótið en hún vann árin 2010, 2009, 2007 og 2006. Mótið var ekki haldið árið 2008.

Mótið er hluti af mótaröð Badminton Europe og sigur á mótinu gefur Rögnu 2500 stig á heimslistanum. Heimslistastaðan í byrjun maí 2012 segir til um hverjir hljóta þátttökurétt á Ólympíuleikunum í London næsta sumar.

Tinna Helgadóttir og Snjólaug Jóhannsdóttir unnu tvíliðaleik kvenna á Iceland International mótinu. Keppinautar þeirra gáfu leikinn þegar staða fyrri lotunnar var 11-4.

Nú eru að hefjast síðustu úrslitaleikir mótsins, einliðaleikur karla þar sem Tony Stephenson frá Írlandi mætir Mathias Borg frá Svíþjóð og tvíliðaleikur karla þar sem Magnús Ingi Helgason og Helgi Jóhannesson mæta Thomas Dew-Hattens og Matihas Kany frá Danmörku.