Hannes varði víti frá Fram og KR fór í úrslitaleikinn

KR-ingar tryggðu sér sæti í úrslitaleiknum á Reykjavíkurmóti karla í fótbolta með sigri á Fram í vítakeppni í undanúrslitaleik liðanna í Egilshöllinni í kvöld. Liðin höfðu gert markalaust jafntefli í venjulegum leiktíma en það var ekki framlengt heldur farið beint í vítakeppni.

KR-ingar skoruðu úr öllum fimm vítaspyrnum sínum í vítakeppninni og Hannes Þór Halldórsson, fyrrverandi markvörður Fram og núverandi markvörður KR, varði aðra spyrnu Framliðsins frá Jón Guðna Fjólusyni.

Þetta er þriðja árið í röð sem KR-ingar slá Framara út úr undanúrslitum Reykjavíkurmótsins en KR-liðið er búið að vinna Reykjavíkurmeistaratitilinn tvö ár í röð. KR mætir annaðhvort Val eða Fylki í úrslitaleiknum en leikur þeirra stendur nú yfir.

- Vítakeppnin-



Bjarni Guðjónsson, KR 1-0

Sam Tillen, Fram 1-1

Baldur Sigurðsson, KR 2-1

Jón Guðni Fjóluson, Fram varið (Hannes Þór Halldórsson)

Aron Bjarki Jósefsson, KR 3-1

Hlynur Atli Magnússon, Fram 3-2

Óskar Örn Hauksson, KR 4-2

Tómas Leifsson, Fram 4-3

Grétar Sigfinnur Sigurðarson, KR 5-3