Ásgerður flytur sönglög Bjarkar

Ásgerður Júníusdóttir messósópran syngur lög eftir Gunnar Reyni Sveinsson, Björk Guðmundsdóttur og Magnús Blöndal Jóhannsson á hljómdisknum Langt fyrir utan ystu skóga, sem nýkomin er út.

Tónskáldin þrjú eiga það sameiginlegt að dansa á mörkum klassískrar tónlistar og annarra tónlistarstefna, til dæmi djass, popps, leikhús-, kvikmynda- og raftónlistar.

Á disknum koma út í fyrsta sinn nýjar útsetningar Jónasar Sen á sönglögum Bjarkar.

Björk pantaði útsetningarnar sjálf og voru þær unnar í samráði við hana, en Jónas hefur leikið undir á hljómplötum og á tónleikaferðalögum með Björk. Einnig má á disknum finna nýjan texta eftir skáldið Sjón við fyrstu tónsmíð Bjarkar, lagið Kjarval, sem kom út á hljómplötu þegar hún var tólf ára.

Meðleikarar Ásgerðar á disknum eru Jónas Sen og Sveitin, djasskvartett sem settur var saman fyrir upptökur disksins en í honum eru Pétur Grétarsson, Þórður Högnason, Kjartan Valdemarsson og Óskar Guðjónsson.

Langt fyrir utan ystu skóga er þriðji hljómdiskur Ásgerðar Júníusdóttur. Á sínum öðrum diski, Í rökkri, flutti hún sönglög Magnúsar Blöndal Jóhannssonar en hér hafa þau verið sett í annan búning. Þá eru lög Gunnars Reynis Sveinssonar flutt í nýjum djassútsetningum Péturs Grétarssonar og Sveitarinnar. Smekkleysa gefur diskinn út.