Fær faðmlög frá viðskiptavinum

Vöruhönnuðurinn Sesselja Thorberg rekur ráðgjafarfyrirtækið Fröken Fix, sem sérhæfir sig í innanhúss- og skipulagsráðgjöf fyrir heimilið. Fyrirtækið stofnaði hún í fyrra og síðan þá hefur hún haft í nægu að snúast.

Sesselja Thorberg hafði verið að gefa fólki ráð í nokkurn tíma en eftir að henni var sagt upp hjá arkitektastofu í kjölfar kreppunnar nýtti hún tækifærið og lét gamlan draum rætast og stofnaði Fröken Fix. Fyrirtækið hefur blómstrað síðan þá og nú hefur Sesselja ráðið til sín annan starfsmann og flutt sig í nýtt húsnæði.

„Það kom mér á óvart hvað þetta hefur gengið rosalega vel, ég hef enn ekki getað tekið mér sumarfrí og það er fullbókað hjá mér næstu tvo mánuðina. Ég hef samt svo ofboðslega gaman af þessu að ég lít varla á þetta sem vinnu, þetta er mitt áhugamál og mín ástríða og fólk virðist ánægt, ég hef fengið þakkarbréf og faðmlög frá viðskiptavinum," segir Sesselja, sem hyggst þó taka sér gott og langþráð jólafrí.

Hún segir viðskiptavini sína vera úr öllum stéttum þjóðfélagsins og verkefnin ólík. „Ég hef aðstoðað námsmann við að taka salernið sitt í gegn á ódýran og hagkvæman hátt og einnig endurhannað heilu herbergin fyrir efnameira fólk, þannig að verkefnin eru mörg og ólík," segir hún og bætir við að kreppan hafi ekki komið að sök, fólk vilji enn hafa fallegt í kringum sig. „Konur fara enn og kaupa sér hælaskó eða fara í strípur og ég held að þetta sé bara spurning um hvort þú viljir eyða í heimilið eða eitthvað annað," segir hún að lokum.

Þeim sem hafa áhuga á að kynna sér starf Sesselju betur er bent á heimasíðuna frokenfix.is.

sara@frettabladid.is