Kempur teknar inn í Frægðarhöllina

Hljómsveitirnar Guns N‘ Roses, Red Hot Chili Peppers og Beastie Boys eru á meðal þeirra sem teknar verða inn í Frægðarhöll rokksins á næsta ári. Athöfnin fer fram í Cleveland í Bandaríkjunum á næsta ári.

Anthony Kiedis, söngvari Red Hot Chili Pepper, fékk fréttirnar þegar hljómsveit hans var á tónleikaferðalagi um Evrópu. „Ég hringdi í pabba og grét,“ sagði hann í viðtali við Rolling Stone.

Þá sagðist hann hugsa til Hillel Slovak, fyrrverandi gítarleikara Chili Peppers sem lést árið 1988.

„Hillel var fallegur maður sem hóf að spila á gítar á áttunda áratugnum en komst ekki í gegnum þann níunda. Hann verður heiðraður fyrir fegurð sína. En við elskum það sem við erum að gera í hljómsveitinni. Ég og Flea elskum hvor annan og stöndum saman í gegnum súrt og sætt.“