Aðdáendurnir himinlifandi með mistök Djöflaeyjunnar

Óklippt innslag af menningarþættinum Djöflaeyjunni, þar sem tökustaður Game of Thrones var heimsóttur, er nú að finna inni á aðdáendasíðu þáttanna, winter-is-coming.net. Eins og Fréttablaðið greindi frá í síðustu viku sást í innslaginu persóna sem framleiðendur þáttanna höfðu lagt ríka áherslu á að yrði haldið leyndri og höfðu gert heiðurssamkomulag við þá fjölmiðla sem heimsóttu tökustaðinn að umrædd persóna yrði hvergi nefnd né birt. Aðdáendur hafa nú upplýst að persónan heitir Ygritte og er leikin af Rose Leslie.

„Ég er búinn að ræða þetta við framleiðendurna og þeir eru auðvitað mjög leiðir yfir þessu. En svona getur alltaf gerst þegar fjölmiðlum er hleypt inn á tökustað og það er ekkert hægt að gera í þessu núna,“ segir Snorri Þórisson, eigandi Pegasus, en fyrirtækið þjónustar tökulið Game of Thrones. Í kjölfarið á kvörtunum brást Þórhallur Gunnarsson, ritstjóri Djöflaeyjunnar, skjótt við og endurklippti þáttinn fyrir vefsíðu RÚV. En það virðist ekki hafa dugað til því vefsíðan winter-is-coming.net, sem er ein stærsta aðdáendasíða þáttanna, birti óklippt myndband Djöflaeyjunnar frá notenda sem kallar sig gunnarahlidarenda. Og þar sést umrædd persóna, skýrt og greinilega. „Ygritte lítur stórkostlega út,“ segir einn af ritstjórum vefjarins.

Umræðurnar um myndbandið eru ansi fjörugar á aðdáendasíðunni og Game of Thrones-aðdáendurnir eru himinlifandi með mistök RÚV. Og sem betur fer fyrir aðstandendur Game of Thrones virðast aðdáendur einnig vera sáttir við útlitið á persónunni. „Ég dýrka lita-pallíetturnar á búningnum hennar,“ segir aðdáandi að nafni Lina.

freyrgigja@frettabladid.is