Oddur: Var svolítið stressaður

Akureyringurinn efnilegi Oddur Gretarsson lék sinn fyrsta leik á HM í kvöld. Hann byrjaði HM-ferilinn ekki á neinum smá leik gegn heims, Evrópu- og Ólympíumeisturum Frakka.

"Þetta var alls ekki leiðinlegt og ég verð að viðurkenna að það var smá stress í mér þegar ég hljóp inn á," sagði Oddur en hann stimplaði sig inn á þessum tæpu fimm mínútum sem hann kom við sögu og kastaði boltanum meðal annars í andlitið á besta markverði heims, Thierry Omeyer.

"Ég tók tvö stressskot. Maður lærir af þessu og þessar mínútur eiga eftir að hjálpa mér mikið. Hann var ekki sérstaklega ánægður með skotið í hausinn og ég bað hann afsökunar. Hann tók því vel.

"Þetta er búið að vera mjög skemmtilegt. Maður lærir af þessu. Að umgangast þessa stráka og svona. Það á eftir að nýtast mér mikið að fá að taka þátt í þessu."

Strákarnir stríddu honum svolítið eftir leikinn fyrir að hafa sett hann í andlitið á Omeyer.

"Það er búið að gera aðeins grín að þessu. Ég hefði samt frekar viljað sjá boltann inni."