Fjórtán ára sigurvegari á atvinnumannamóti

Lydia Ko fjórtán ára gömul stúlka frá Nýja-Sjálandi varð í dag yngsti kylfingurinn til að sigra atvinnumannamót í golfi þegar hún sigraði New South Wales Open kvenngolfmótið á áströlsku mótaröðinni.

Áhugamaðurinn Ko vann með fjögurra högga mun og bætti met Japanans Rory Ishikawa sem sigraði á japönsku mótaröðinni 15 ára gamall og átta mánaða.

"Þetta er ótrúlegt, ég veit ekki hvað ég get sagt," sagði Ko sem verður 15 ára gömul 24. apríl.

Ko fékk engan skolla á lokahringnum þar sem hún lék á 69 höggum eða þremur undir pari. Hún lék alls á 14 höggum undir pari. Ko bætti þar með fyrir mistök sín frá því á sama móti frá árinu á undan þegar hún þrípúttaði á lokaholunni og varð að sætta sig við annað sætið, höggi á eftir Caroline Hedwall.

"Þetta tók mjög á taugarnar. Ég var stressuð þar til á síðustu sekúndu. Ég hugsaði um það sem gerðist í fyrra og leit til baka og sá hvað það voru margir að horfa," sagði Ko.