Pálmi Rafn kallaður í landsliðið

Pálmi Rafn Pálmason, leikmaður Lilleström í Noregi, hefur verið kallaður inn í íslenska landsliðið fyrir leikinn gegn Svartfellingum ytra á miðvikudaginn.

Fram kemur á vef KSÍ að þeir Emil Hallfreðsson og Aron Einar Gunnarsson eigi við smávægileg meiðsli að stríða og því hafi verið ákveðið að kalla á annan miðvallarleikmann í hópinn.

Liðið er komið til Svartfjallalands og æfir í kvöld. Verður Pálmi Rafn með á æfingunni en leikurinn fer fram klukkan 17.00 á miðvikudaginn.

Aron Einar spilaði allar 120 mínúturnar í deildabikarúrslitaleik Liverpool og Cardiff í gær og meiddist lítillega í framlengingunni. Emil meiddist hins vegar á æfingu með liði sínu, Hellas Verona, á Ítalíu.