Fær ekki að útbúa veiðitjörn í fólkvangi

Ekki fæst leyfi fyrir því að sleppa regnbogasilungi í Stórhólstjörn í Dalvíkurbyggð og selja íbúum í sveitarfélaginu veiðileyfi þar.

Í synjun umhverfisráðs Dalvíkur segir að umsókn Júlíusar Magnússonar um aðgang og afnot af Stórhólstjörn sé óljós og uppfylli auk þess ekki ákvæði samþykktar um fólkvang í Böggvisstaðafjalli.

Auk þess sem Júlíus hugðist selja silungsveiðileyfi í tjörninni ætlaði hann að vera með aðstöðu á svæðinu þannig að til dæmis væri hægt að bjóða upp á hressingu, veiðistangir og annað sem tengist veiðiskap.

Í afgreiðslu umhverfisráðs er undirstrikað að Stórhólstjörn sé innan fólkvangsins í Böggvisstaðarfjalli. Í samþykktum um hann segir varðandi landnotkun og mannvirkjagerð:

"Allar framkvæmdir innan fólkvangsins eru háðar leyfi Dalvíkurbyggðar og Umhverfisstofnunar, sbr. 38. gr. laga um náttúruvernd, nr. 44/1999. Framkvæmdir skulu vera í samræmi við samþykkt skipulag og verndaráætlun, en svæðið skal skipulagt til almennrar útivistar."