Fyrsti Rínar-laxinn í Sviss í 50 ár

Fyrir skömmu gerðust þau merku tíðindi að lax gekk upp ána Rín allt til bæjarins Rheinfelden í Sviss. Þetta hafði ekki gerst í fimmtíu ár.

Orri Vigfússon, formaður Verndarsjóðs villtra laxastofna (NASF), segir þetta verulega góðar fréttir sem og að sjö laxar hafi í vetur gengið upp Elbu alla leið á hrygningarstöðvar sínar í Tékklandi.

Dagblaðið Badische Zeitung segir frá laxinum sem veiddist í Rín í frétt í lok maí. Hann vó tæp 13 pund og mældist 89 sentímetra langur. Laxinn var merktur, tekið sýni, og honum síðan sleppt aftur.

Rín er á meðal lengstu áa Evrópu. Hún teygir sig rúma 1.200 kílómetra frá Norðursjó og allt niður til Sviss. Laxinn hefur því ferðast um langan veg. Sú staðreynd að hann hafi komist alla þessa leið þykir sýna að bygging laxastiga og hjáleiða framhjá skipalyftum og stíflum hafi borið árangur. Það er hins vegar allt of snemmt að spá nokkru um að það hvort laxagengdi verði mikil á þessum slóðum.

Rheinfelden er smábær við landamæri Þýskalands. Þar búa um 12 þúsund manns.