Veiði að glæðast í Straumunum

Sex laxar hafa veiðst í Straumunum í Hvítá í Borgarfirði, en veiði hófst á svæðinu þann 5. júní. Þetta kemur fram á vef SVFR.

"Við náðum tali af Jóni Hermannssyni sem stóð á bakkanum i morgun og sagði hann tvo laxa hafa fengist seinnipartinn í gær," segir á vef SVFR. "Annar var smálax um sex pundin, hinn var níu pund. Í veiðibók voru þá komnir sex laxar - hinir fjórir veiddust þann 8.júní og voru að tíu pundum að þyngd."

Á vef SVFR segir að ekkert hafi veiðst fyrstu þrjá dagana í Straumum. Líklega megi rekja það til þess að þá daga var stórstreymt en það er ekkert sérlega hagstætt á þessu veiðisvæði. Í stórstreymi flæðir upp fyrir Straumklöpp svæðið verður illa veiðanlegt.

"Nú fer straumur hins vegar smækkandi og hagur veiðimanna vænkast í Straumunum. Við erum því nokkuð bjartsýn fyrir hönd þeirra sem eiga daga á næstunni," segir á vef SVFR.